9 Parfuumgeure vir die Tussenin-dae

Nie meer somer nie, maar ook nog nie heeltemal winter nie? Hier is ’n paar geure vir die tussenin-dae – van sagte ondertone tot ryk, weelderige aandgeure.

Die verandering in seisoen en die tussenin-weer bring ’n spesiale soort besluiteloosheid. Die byt in die oggendlug laat jou dalk mik na ’n sagte trui en ’n jas, maar in die namiddag verlang jy weer na jou kortmoue.

Laatherfs is die soort weer wat nog nie ’n klerekasverandering noodsaak nie, net ’n paar subtiele verskuiwings nodig maak. Dieselfde geld vir jou parfuum.

Waar die somerhitte vra vir vars sitrus-, lemoenblomolie- en optimistiese blomgeure, is herfs die tyd vir hout- en spesery-ondertone, wat tekstuur aan jou uitrusting verskaf. Hierdie geure word saamgestel om te draal en gevoelens van gemak te skep.

Hoe so?

Wel, geure het ook ’n diep psigologiese impak. Byvoorbeeld, warmer note soos amber, vanielje of hout word dikwels geassosieer met gemak en kalmte. Daar kan dus gesê word dat, in ’n seisoen wat deur oorgang gekenmerk word, warm note ’n soort sensoriese stabiliteit bied.

As jy op die uitkyk is vir nuwe geure, oorweeg hierdie drie reukregisters – vanaf lig tot weelderig: 

Geure vir elke dag

Sekere geure kan jy elke dag dra. Dit het warm ondertone, maar is steeds lig genoeg dat dit reg is vir enige geleentheid.

Zara, Gardenia EDP

Kategorie: Vir haar

Prys + beskikbaarheid: R399  | ZARA

Moenie dat die blomnaam jou mislei nie. Hierdie is katjiepiering met ’n tikkie sofistikasie: ryk, byna fluweelagtig, met ondertone van koffie en vanielje. Dis toeganklik, maar meer kompleks as wat die prys suggereer.

WBeauty, Oud Intense EDP

Kategorie: Vir hom

Prys + beskikbaarheid: R529 | Woolworths

Saffraan en roos lei die sagte blomgeur in, maar die kern is hout, amber en patchouli. Daar is ook ondertone van muskus, wat lei tot ’n warm geur wat steeds geskik is vir enige geleentheid.

Maison Margiela Replica, Jazz Club EDT

Kategorie: Mans en vroue

Prys + beskikbaarheid: R1500 – R2950 | ARC Store

Die geure van pienk peper, lemoenblomolie en suurlemoen word aangevul met rum, salie en kuskusgras. Daar is ook ondertone van tabak, vanielje en storaksboom wat ’n warm, ligte geur skep met rokerige ondertone.

LEES OOK: Tik ’n bietjie Netflix aan jou polse – die Bridgerton- en Emily in Paris-parfuumreekse is hier

Geure wat atmosfeer skep

Hierdie is parfuum wat nuanse skep in enige versameling. Dis nie kompleks nie, maar dit maak ’n stelling.

Elie Saab, L’Homme Intense Eau de Parfum

Kategorie: Vir hom

Prys + beskikbaarheid: R1825 – R2685 | ARC Store, Woolworths, Edgars, Superbalist.com, Bash.com 

Dis ’n oorganggeur in die ware sin van die woord. L’Homme Intense begin met lemoenbloeisel wat vir ’n oomblik bekend en amper eenvoudig voel, voordat ondertone van leer die geur in ’n ander rigting stuur. Die verskuiwing is subtiel maar beslissend, met tonkaboontjie wat ’n droë, warm profiel skep. Die geur op die vel is gebalanseerd en ingetoë – die soort parfuum wat nie te hard probeer nie.

Jo Malone, Wood Sage + Sea Salt Cologne

Kategorie: Mans en vroue

Prys + beskikbaarheid | Jo Malone, Woolworths

Met sy mineraal- en seebriesgeure, herinner hierdie reukwater aan herfsdae aan die kus. Vuurblomsaad verleen ’n muskusgeur onderliggend aan die sout en salie, wat ’n balans skep tussen aardsheid en lugtigheid. Dis skoon en vars, maar nie op ’n steriele wyse nie.

Aesop, Hwyl EDP

Kategorie: Mans en vroue

Prys + beskikbaarheid: R3890 | Loading Bay (Kaapstad), Aesop-vlagskipwinkel (Hyde Park Corner), Skins Cosmetics aanlyn + winkel

Die geur is rokerig, maar nie swaar nie. Sipres en tiemie word aangevul met elemiolie, wat ’n droë, aromatiese geur inlei. Die kern is wierook en subtiele spesery. Kuskusgras, seder en mos anker die geur, wat lei tot ’n rokerige, houtprofiel wat gebalanseerd en mymerend is.

Geure wat ’n belegging is

Sommige parfuums is ’n ervaring en nie net ’n bykomstigheid nie. Bederf jouself met ’n dieper, meer weelderige geur wat met die verloop van die dag ontvou.

CHANEL No. 5 EDT

Kategorie: Vir haar

Prys + beskikbaarheid: R3225 – R4450 | Chanel Fragrance + Beauty Boutique, Woolworths 

“N°5 Eau de Toilette is ’n moderne, abstrakte blomgeur met ’n subtiele houtfaset. Die geur maak ’n stelling met sy elegansie en kompleksiteit.”

– Olivier Polge, CHANEL se parfuumskepper –

Dis nie net ’n parfuum nie, dis ’n kulturele artefak. Hierdie is ’n warm, opwindende herinterpretasie van die klassieke geur wat in 1921 deur Gabrielle Chanel bekend gestel is. N°5 Eau de Toilette begin met ’n boeket van roos, jasmyn en ilang-ilang, en word aangevul met aldehied. Sandelhout en kuskusgras verleen diepte en tekstuur aan die geur.

Dis kompleks, veelvlakkig en elegant.

Le Labo, Thé Matcha 26 EDP

Kategorie: Mans en vroue

Prys + beskikbaarheid: R5790 – R7990 | Skins Cosmetics

Daar is ’n rede hoekom matcha met rituele in Japan verbind word, en hierdie geur gee daaraan erkenning. Dit begin met sagte vye, terwyl bitterlemoen verhoed dat dit te soet is. Daarna kom die matcha in fokus, met kuskusgras en seder wat dit ’n kenmerkende teenwoordigheid gee. Dit verander stadig, wat dit fassinerend maak.

Maison Francis Kurkdjian, Grand Soir EDP

Kategorie: Mans en vroue 

Prys + beskikbaarheid: R2840 – R8990 | Skins Cosmetics

As jy die perfekte aand in ’n bottel kon vasvang, sou dit só ruik. ’n Kombinasie van mirre en lemoen lei die warm geur in, terwyl bensoïen en tonkaboontjie die hart van die profiel is. Amber en vanielje rond die geur soet af, wat die parfuum nog lank laat draal nadat jy die vertrek verlaat het.