GoPro pak DJI en Insta 360 met die Mission 1

Drie kameras. Drie uiteenlopende filosofieë. En een vraag in elke vlogger se kop: Watter een verdien jou swaar verdiende rande? GoPro het pas tot die 1 duim-kamerawedloop toegetree met die Mission1-reeks – en dit is ’n absolute monster.

Die afgelope paar maande het kamera- en tegnologieforums, sowel as vloggemeenskappe gegons oor die nuwe buksies op die mark. Daar was die modulêre Insta360 Luna, met sy Leica-lense, en die bespiegelings rondom die DJI Osmo Pocket 4 Pro. Dit het gelyk of die vlogwêreld onvermydelik gaan verdeel tussen die skarniergewrig-kamera-gebruikers en die modulêre kamera-entoesiaste.

Toe gooi GoPro ’n knuppel in die hoenderhok met die Mission 1-reeks.

Die Mission 1-reeks, wat GoPro onlangs bekend gestel het, is nie bloot opgeterte weergawes van die GoPro Hero nie. GoPro het ’n massiewe 1 duim-“rolprentgehalte”-sensor in ’n versterkte, tenkagtige dop ingeprop. Die resultaat? Iets wat nog nooit gesien is in die kompakte-kamera-wêreld nie.

Kom ons kyk presies wat GoPro op die tafel geplaas het, hoe dit teen sy mededingers opweeg, en watter kamera dalk vir jóú die beste sal wees.

Spesifikasies van die Mission 1 vs Mission 1 Pro

Die Mission 1 is ’n heeltemal nuwe produk van GoPro waarin hulle gevorderde kamera-tegnologie, soos dié wat in die professionale filmbedryf gebruik word, met hul aksiekamera-DNS gekombineer word. Dit word aangedryf deur hul ultra-doeltreffende 5nm GP3-verwerker en ’n geïntegreerde AI Neurale Verwerkingseenheid (NPU), en spog met ’n verstommende 50MP 1 duim-sensor wat tot 14 stops dinamiese omvang kan hanteer.

Hier is hoe die basismodel en sy kragtige Pro-weergawe hul tegniese DNS verdeel:

GoPro Mission 1

Videoresolusie: 8K teen 30fps, 4K teen 120fps, 1080p teen 240fps (16:9)

Open Gate-opname: 4K teen 120fps (volledige 4:3-formaat sodat jy die beeld horisontaal of vertikaal kan uitsny na gelang van die sosiale media-platform)

Lens: Vaste ultra-wyehoeklens wat 159 grade gesigsveld bied, met verwyderbare lenskap

Duursaamheid: Waterdig tot 20 m sonder eksterne omhulsel

Skerm: Nuwe hoë-kontras OLED- agterste raakskerm (14% groter as vorige skerms)

Batterylewe: 3+ uur vir opnames teen 4K30; 5+ uur teen 1080p30 (snel-herlaaiende Enduro 2-battery)

GoPro Mission 1 Pro

Videoresolusie: Professionele 8K teen 60fps, 4K teen 240fps, 1080p teen 480fps

Open Gate-opname: 8K teen 30fps, 4K teen 120fps

Ekstreme stadige aksie: 10 sekonde-sarsies tot ’n verstommende 960fps in 1080p

Uitsaai-/rolprent-eienskappe: Gevorderde klankondersteuning, 10-bit GP-Log2-kleurprofiel, 240 Mbps opname-bitrate, en spesiale hardeware vir tydkode-sinchronisasie

Duursaamheid en skerm: Dieselfde as die basismodel (20 m waterdig, uitgebreide OLED-skerm)

Let op: GoPro stel later vanjaar ’n gespesialiseerde Mission 1 Pro ILS-model bekend, wat jou sal toelaat om lense te wissel.

Hoe weeg die GoPro Mission 1 op teen DJI Osmo Pocket 4 Pro en Insta360 Luna

Die kompakte videomark het baie rolspelers, wat almal goed is. Hierdie drie puik kameras bied elkeen iets unieks.

Die DJI Osmo Pocket 4 Pro kraai koning wat betref seepgladde videomateriaal sonder dat jy enigiets aan die kamera hoef te verander. Sy meganiese skarnier gee jou ’n groot voordeel in sterk skemer en hou die lens perfek stabiel.

GoPro het egter hierdie uitdaging met albei hande aangegryp. Terwyl die Mission 1 die digitale HyperSmooth-funksionaliteit gebruik, het hulle ’n ekstra geheime wapen bekend gestel: ’n losstaande Fluid Pro AI-selfiestok met ’n skarnier. Dit laat jou toe om die brose skarnierstok in jou kamersak te los as dinge te rof raak.

Die Insta360 Luna volg ’n heel ander benadering met sy modulêre ontwerp en dubbellensstelsel vir verskillende fokuslengtes. Die verwyderbare skerm wat ook as afstandbeheer kan dien, is ongelooflik slim vir solo-inhoudskeppers wat moeilike driepootskote opstel. Sy dubbele battery- en multi-gewrigstruktuur voel minder solied as ’n eenstuk-kamera.

ALLES sê: Watter kamera pas die beste by jou?

Die rolprent-gehalte kamera wat ’n paar stampe en stote kan vat: GoPro Mission 1/Pro

Beste vir: Reisvloggers, buitelug-rolprentmakers, en hoë-impak inhoudskeppers wat Hollywood-gehalte beeldmateriaal benodig sonder om bang te wees dat hulle duur toerusting beskadig word.

As jy goeie beeld in swak beligting soek en daarom ’n 1 duim-sensor nodig het, maar jy skiet tonele terwyl jy in die berge stap, duik, motorfiets ry of ongure weer trotseer, is die Mission 1 die onbetwiste keuse. Die Pro-model se 10-bit log, tydkode-sinchronisasie, en 32-bit float-klank beteken dit sal naatloos in professionele multi-kamera-produksiestelle inpas terwyl dit nie sal breek as dit val nie.

Die solo vlogger: DJI Osmo Pocket 4 Pro

Beste vir: Vloggers in die stad, leefstylskeppers, onderhoudvoerders, en enigiemand wat baie in swak lig skiet.

As jou primêre doel is om ’n klein stok uit jou baadjiesak te trek, ’n knop te druk en dadelik jou gesig wil afneem, is die DJI Osmo Pocket 4 Pro die kamera vir jou. Moet dit egter nie naby die see neem of op ’n klipperige roete laat val nie.

Die Switserse weermagmes-ateljee: die Insta360 Luna

Beste vir: Kreatiewe tegnologie-entoesiaste, videograwe wat met verskillende hoeke wil eksperimenteer, en solo-skeppers wat ’n veelsydige produksie-hulpmiddel benodig.

As jy daarvan hou om ’n kamera aan die ander kant van die kamer op te stel en ’n draadlose afstandbeheer te gebruik om die toneel af te neem en die klank te stel, gaan die Luna jou lewe verander.

Kry dit by takealot.com

Basiese eenheid van die GoPro Mission1 sowat R15 295

GoPro Mission 1 Grip Edition sowat R16 995

Hierdie artikel is nie geborg nie, maar bevat geaffilieerde skakels. As jy ’n aankoop deur die skakel maak, sal ALLES ’n klein kommissie verdien sonder dat jy iets ekstra betaal. Alle menings is dié van die redaksie.