Op soek na ’n nuwe TV in 2026? Hier is alles wat jy moet weet

Saamgestel deur Dennis Cavernelis

Is jy gereed om ’n nuwe TV aan te skaf, maar jy voel verlore in ’n see van tegniese terme en eindelose opsies? Jy is nie alleen nie! Met TV’s wat begin by ’n paar duisend rand en opskiet tot by die prys van ’n duur motor, en genoeg akronieme om jou kop te laat draai, kan die keuse van die regte TV soos ’n onbegonne taak voel. Maar of jy nou ernstig is oor rekenaarspeletjies, gek is oor sport, graag rolprente tuis kyk, of net iets ordentliks vir die gesinskamer soek, ALLES het voorstelle vir jou. Hier is alles wat jy moet weet om die korrekte TV te kies.

Om ’n nuwe TV te koop, kan oorweldigend wees – daar is ’n oorvloed terme – 4K, 8K, HD, UHD, HDR, SDR, OLED, LED, QLED, NeoQLED – en as jy in ’n winkel staan, lyk almal maar baie dieselfde.

Waar om te begin?

Daar is drie dinge om in gedagte te hou

• Hoe ver sal jy van die TV af sit? Dit bepaal die grootte van die TV.
• Hoe helder is die kamer waarin dit sal wees? Sommige TV’s kan hul instellings outomaties aanpas om die beste beeld te gee.
• Waarvoor gaan jy dit gebruik? Flieks, TV, sport, speletjies, of ’n kombinasie hiervan?

Grootte maak saak

Die meeste moderne TV’s groter as 42 duim is 4K of Ultra HD (UHD). Die grootte van die TV-skerm word gemeet aan die diagonale lengte van die skerm – ’n 42 duim-skerm is gelyk aan 107 cm. Die ideale kykafstand is 1 tot 1,5 keer die grootte van die skerm vir 4K, en 1,5 tot 2,5 keer vir 1080p of HD. ’n HD-TV vereis effens meer afstand van die skerm om te voorkom dat jy pieksels sien, terwyl jy nader aan ’n 4K-skerm kan sit weens sy hoër resolusie. As jy egter ’n 100 duim-TV koop wat twee meter van jou bank af geplaas is, sal dit fantasties lyk, maar jy sal te naby wees om die hele skerm te sien.

Ideale kykafstand vir ’n 4K-TV, volgens die skermgrootte

• 50-55 duim-TV: 1,8 tot 2,4 m van die skerm
• 60-65 duim-TV: 2,4 tot 3 m van die skerm
• 70-80 duim-TV: 3 tot 4 m van die skerm
• 85-100 duim-TV: Meer as 4 m

Die terme

LED (of QLED, Mini-LED, ens.) vs OLED

Dit verwys na die piepklein liggies wat ’n beeld op die TV-skerm vorm. OLED, wat staan vir Organiese Liguitstralende Diode, is die luukser opsie vir ernstige film- en speletjie-entoesiaste, aangesien dit perfekte swart, ’n groot kontras en vinniger reaksietye bied.

LED-skerms gebruik agterbeligting om dit helderder te maak, en bied beter beskerming teen “inbranding” (spookbeelde wat op die skerm bly). LED-skerms is gewoonlik goedkoper en meer geskik vir helder vertrekke. Hierdie soort TV’s is meer algemeen beskikbaar.

4K vs 8K

Die meeste nuwe TV’s is 4K of Ultra-hoë Definisie (UHD). Dit verwys na die aantal pieksels op die skerm. Op ’n behoorlik opgestelde TV lyk dit ongelooflik lewensgetrou.

8K is die volgende stap, en so indrukwekkend soos dit klink en lyk op die TV wat in die winkel aan jou gewys word, is daar tans feitlik geen TV-inhoud in 8K beskikbaar nie – geen stroomdienste of uitsaaikanale saai enigiets in 8K uit nie, en daar is ook geen fisiese media in daardie resolusie beskikbaar nie. 8K-TV’s sal inhoud opgradeer om die bes moontlike beeld te gee, maar dit sal nie regtig 8K wees nie; op sy béste sal dit 4K wees.

Stroomdienste soos Netflix, Apple TV+, Disney+, Prime Video en Google TV bied 4K-inhoud aan – as jy hul premium-intekening het, maar jy sal ook hoëspoed-internet moet hê om daarna te kyk – 50 tot 100 Mbps.

Wat is beskikbaar?

Beste vir… GROOTTE

Hisense 116UX | RGB-MiniLED 4K VIDAA Slim TV

Teen 2,94 m is dit die grootste TV wat tans in Suid-Afrika beskikbaar is, hoewel ander vervaardigers kort op Hisense se hakke is met TV’s van 115 duim en 110 duim. Vir die prys van ’n middelklas-motor kry jy ’n byna ongeëwenaarde kykervaring, insluitend CineStage X-Surround 6.2.2-luidsprekers wat jou sal laat voel asof jy in ’n fliekteater is.

R300 000, 116”, www.hisense.co.za

Beste vir… FLIEKS

LG OLED evo AI C5 4K 144Hz Slim TV

Hierdie model kom in groottes van 55” (1,4 m) tot 83” (2,1 m). Sy OLED-tegnologie spog met meer as 8,3 miljoen selfbeligte slim pieksels, wat perfekte swart en helder kleure skep.

R100 000, 83”, www.lg.com/za

Beste vir… SPELETJIES

Samsung S90F 4K OLED Vision AI TV

Beskikbaar in groottes van 48” tot 83”, met ’n verwerker wat tonele individueel analiseer en helderheid verbeter.

R60 000, 77″, www.samsung.com/za

Beste vir… SPORT

TCL C8K Series Mini LED QLED

Hierdie TV bied helder kleure en byna perfekte swarte, wat ideaal vir sport is.

R26 000, 75”, www.tcl.com/southafrica

Beste vir… AS JY DIE OOG WIL VANG

Samsung The Frame

Hierdie TV lyk soos die raam van ’n skildery en kan kunswerke vertoon wanneer dit nie gebruik word nie.

R20 000, 65”, www.samsung.com/za

Beste vir… ’n SAKPAS-BEGROTING

Skyworth 65″ Q6600H 4K QLED

Bekostigbaar en ideaal vir lang kyk- of speelsessies.

R8 000, 65”, www.skyworth.co.za